Admin admin posted on March 28, 2010 10:54
Sey parî emser zî Newroza Dîyarbekirî bê teşqele û pêrodayîş, bê ke kes bitepişîyo yan birîndar bibo vîyart. Emser meydanê Newroze ser o, şarî ser o, asmên ra teyareyê artêşa tirkan zî nêvîyartîy.
Labelê roşanê Newroze Dîyarbekir de roşanêk ra vêşêr sey mitîngî pîroz beno. Nêmaneno roşanê miltê kurdî, eynen beno mitîngê partîyêka sîyasî. Bi se hezaran şar şino meydanêko raste de kom beno. Tayê deyîrbazî, muzîsyenî konser danê. Şaro ke ameyo meydan, qismêkê înan deyîran reyde xo erzeno we; hopehop kenê, qedîyayîşê her deyîre de çepikan cenenê. Qismêk zî tim gêreno; nat ra şinê wet, wet ra yenê nat; tim lebitîyenê. Berpirsîyarê partîya sîyasî vejênê serê sehne û xîtabê şarî kenê. Xîtabetê xo de mesajanê xo yê sîyasîyan danê. Zafê şarî bi nîyetê pîrozkerdişê roşanê Newroze şino feqet netîce roşan yan Newroze nîya, mitîngêko sîyasî yo.
Bîy di serrî ke Dîyarbekir de, meydanê Newroze de çîyêdo zaf balkêş zî qewimîyeno labelê kes behs nêkeno, rojnameyî nênusenê. Şarê Dîyarbekirî ra tayê merdimî beyraqa Kurdîstanî akenê. Berpirsîyarê partîya sîyasî ke roşanê Newroze organîze kenê (mavajin, komîteya tertîbkerdişê mitîngê Newroze!) bi şidet vera beyraqa Kurdîstanî de vejîyenê. Mesela, emser gama ke beyraqa Kurdîstanî abîye, serê platformî ra berpirsîyarêk mîkrofon de bi hêrs anons kerd, qîra, va:
- Şu yabacı bayrağı kaldırın! (A beyraqa xerîbe wedarê!) Beyreqa xerîbe ke vanê “wedarêne” beyraqa kurdan û Kurdîstanî ya, alaya rengîn a ke hezaran şehîdî seba aye gonîya xo rijnaya. Alaya rengîne ke şeref, namus, rûmet û hîssîyatê kurdan ê neteweyî temsîl kena. Înanê ke beyraqe hewanabî, qet goş nêda bi nê anonsî. Hîna vêşêr ro beyraqa kurdan wayîrîye kerde, hîna vêşêr beyraqe berz kerde. Çend dedîqeyî badê pey, na rey yewêko wezîfedar bi xo ame verê kesanê ke alaya rengîne hewanaya û va:
- Bu KDP bayrağını kaldırın buradan! (Na beyraqa KDP tîya ra wedarêne!) Înan va: - Na beyraqa kurdan û Kurdîstanî ya, yê KDP nîya! Da-des deqîqeyî badê ey, na rey da-pancês mîlîtanê ke rîyê xo bi maskeyan nimito, êrîşê merdimanê ke beyraqa Kurdîstanî hewanaya kerd. No xirecir û arbede de şarî zî hetê kesanê ke alaya Kurdîstanî hewanaya kerd. Êrîşkarî mecbur mandîy, apey agêray. Roşanê Newroze Dîyarbekir de bîyo mitîng. Nê mitîngî de êrîşê alaya Kurdîstanî beno. Alaya kurdan sey “beyraqêka xerîbe” name bena. Mîyanê hende qelebalixî de no hedîseyo muhîm sey yew detayê qijkekê bêqîymetî mend. Kam çi vano wa vajo, mi gore, no teferuat sey yew eynike karaktero rastîn yê mucadeleyê kurdanê Bakurî nîşan dano. Dîyarbekir, 21.03.2010
Rojnama Rudaw Hûmare 37