Encamnameya Damezrandina Kongreya TEVKURD

Koma Xebatê ya Neteweyî ya Demokratîk, di 26-27ê Gulana 2007an da li Dîyarbekirê civîya û di Kongreya Yekîtîyê da biryar girt ku bîr û rayên jêrîn ragihîne raya gel.
 
Kongreya me ya Yekîtîyê, xebatên ku di civîna 17-18ê Kanûna 2005an da hatibûn destnîşankirin nirxand û ji bo tevgerên xwe yên pêşerojê  wek bingeh program û destûrê gihandiye encamekê û kurtenavê TEVKURD ango Tevgera Yekîtîya Neteweyî ya Kurd wergirtiye.
 
Tevgera Yekîtîya Neteweyî ya Kurd ji partîyên siyasî, hewildan, derdor, kom, înîsîyatîf, sazî, dezgeh û kesayetîyên serbixwe yên ku perspektîva yekîtîya neteweyî dixwazin û dibêjin, divê neteweya Kurd bi rayek azad li ser axa xwe pêjeroja xwe bi dest xe û wek malbatên netewe yên azad xwedî maf û azadîyan be, pêk tê.
 
TEVKURD, hêjayîyên hevpar ên azadî û rizgarîya gelê me destnîşan kiriye û wek armanc daye ber xwe ku van hevparîyan zêde bike û bike malê gel. Bi vê armancê hêzên neteweyî yên demokratîk ên ku xwedî  rêxistin û bîr û hizrên cuda ne, di çarçeveya têkoşîn û hizrên yekdozî da anîye ber hev.
 
TEVKURD, di wê bawerîyê da ye ku yek ji sedemên hîmî yên pirsgirêkên navçeyê, nexşeya ku li dervayî îradeya gelê Kurd û gelên navçeyê hatiye çêkirin e. Yekîtîya Kurdistanê ya bi welat û gelê xwe  ra wek mafeke dîrokî dibîne.
 
TEVKURD, di xebatên xwe da rewayî û serkêşîya sivîl, rûmeta mafên mirovî, demokratîya azadîxwaz û pirrdengî dike bingeh. Têkoşîna demokratîk û aşitîxwaz dihebîne.
 
Kongreya me ya yekîtîyê, destnîşan dike ku dewleta Tirk di krîzekê da ye û ev krîz ji ber dijminatîya hember neteweya Kurd a ku dixwaze li ser axa xwe, xwe bi rêve bibe kûr bûye.
 
Tevgera Yekîtîya Neteweyî ya Kurd destnîşan dike ku terora îroyîn a li ser şanoyê ye ji ber kûrbûna krîza rejîmê derketîye holê, kevnelîstik û fenên hêzên statukoperest û kaosxur ên naskirî ne.
 
TEVKURD radigihîne ku dewleta Tirk bi maneya Kerkûk û PKKyê, Kurdistana Başûr ji xwe ra kiriye hedef û bi êrîşkarî û huqûqnenasî tevahîya neteweya Kurd daye ber dasa xwe. Em radigihînin raya giştî ya dinyayê ku, ji ku derê dibe bila bibe, em li dij êrîş ên li hember destkeftîyên neteweya Kurd radiwestin û vê têkoşînê wek erkeke welatperwerî dizanin.
 
Yekîtîya Neteweyî ya Kurd, pêbawerîya xwe dubare dike ku di Rohilata Navîn a nûşikilgirtî da, Neteweya Kurd a ji 40 milyonî bêtir, xwedî maf û biryara avakirina dewleta xwe ye.
 
TEVKURD, xwedî li destkeftîyên neteweyî yên Kurdistana Başûr derdikeve û piştgirîyê dike, bi Parlamentoya Federe a Kurd û hukûmeta wê ra dikeve hevkarîyeke xurt.
 
TEVKURD, di avakirina yekîtîya neteweyî da hewl dide ku hêzên xwedî bîr hizrên cuda, li ser hîmê rûmetgirîyê û hevhebînê bên ba hev. Herwisa bo nimandina îradeyek yekgirtî ya neteweya Kurd hedefa avakirina Kongreyek Neteweyî daye ber xwe.
 
Kongreya me ya yekîtîyê, di rêça îradeya sazkirinê da bawerîya xwe ya bo hewildanên yekîtîyê û pêwîstiya wê nîşan daye û daye zanîn ku ew ne di hewildanekavakirina partîyekê da ye.
 
TEVKURD, bi armanca zelalkirin û tekûzkirina prensîbên hundirîn ên destûrê bo hevbeşên Kongreya Yekîtîyê, şeş meh şûnda Kongreyek DESTÛRÊ dicivîne û vê komcivînê wek erkek dide ser milê Meclîsa Yekîtîyê.
 
27 Gulan 2007 Dîyarbekir
 
 Tevgera Yekîtîya Neteweyî ya Kurd
 
           TEVKURD